1st Hunasan Festival @ Brgy. Mazawalo

Ang hunasan gikan sa Sinugbuanong Bisaya nga pinulongan nga ang boot ipasabot mao ang dakong hawan sa kadagatan kung kini muhunas o ang paghubas sa dagat. Ang hunasan adunay mga hiyas susama sa mga kinhason nga naghatag ug panginabuhian sa atong mga kaigsoonan nga nagpuyo sa daplin sa dagat. Ang HUNASAN FESTIVAL usa ka sadya nga pamaagi sa pagpasalamat sa atong Patron nga si Senor San Roque sa mga grasya nga padayon niyang gibubu sa hunasan sa Brgy. Mazawalo.

Ang pagkahimugso niining HUNASAN Festival mao usa sa mga pamaagi nga gipanguluhan sa atong Barangay Council inubanan sa pag-ayuda sa atong Municipa Eco-Tourism Council, Inc, aron maablihan ang atong tagsa-tagsa ka mga huna-huna nga atong ampingan ug protektahan ang atong kalikopan lakip na ang atong mga katunggan ug mga hunasan. Kini nga mga lakang sa pagproteher sa atong mga katunggan ug hunasan mao ang kinauyukan nga katuyuan ning atong HUNASAN Festival.

Kini aron ang mga kabatan-onan sa umaabot nga henerasyon masinati pa nila ang mga hiyas sa atong mga HUNASAN. Dili unya ug dili ugma, karon ang husto nga kahigayonan nga padayon natong iamoma ang mga hiyas sa atong Hunasan. Kini ang usa sa mga kabilin nga atong mahatag sa atong mga anak ug umaabot nga mga apo.

Ang tingog sa kadaugan hinaut maglanog-lanog diha sa atong tagsa-tagsa ka mga kasing-kasing nga kita magmadaugon batok sa mga tawo nga adunay mga daotan nga tinguha ug laraw sa atong mga katunggan ug mga HUNASAN. Kung atong balikon ang kasaysayan sa pagkamugna sa Barangay Lili-on ang karaan nga pangalan sa atong Barangay. Mahinumdoman nga ang panginabuhian sa mga lumulopyo mao ang pagpanginhas ug mga kinhason susama sa aninikad, dawdaw, imbaw, pasayan ug uban pa.

Sila sugaton sa mga tawo sa mama ug lili-on ang sulod sa bakat. Ug dinhi nahimugso ang Barangay Lili-on nga adunay daotan nga imahe sa kaniadtong unang panahon. Kini ilado isip lugar sa mga maldito ug dautan nga mga tawo. Sa pagpaningkamot ni Sergio Marilao usa sa mga unang kapitan, giabunohan niya ang mga yuta nga maabtan ug dagat ug nagpahimo siya ug tulay sa lakdun ubos sa ospital.

Ang mga unang lumulopyo sa Brgy. Lili-on mao ang pamilya Sanico, Pajaron, Pintoy, Manzanas, Sarmiento, Ruiz ug ang mga niaging amahan sa Barangay nga sila Vivencio Marilao, Edoc Pajaron ug uban pa. Sa paglabay sa panahon, hinay-hinay nga na edukar ang mga lumulopyo ug hinay-hinay usab nabag-o ang dagway sa Barangay.

Gikan sa Brgy. Lili-on nahulipan kini og Brgy. Mazawalo nga gikan sa upat ka kalye nga sakop niini. Kini ang kalye sa Mabini, Zamora, Washington ug Lopez. Ug karon ang kabag kabag-ohan sa atong pinangga nga barangay klaro ug tataw. Gikan sa us aka barangay nga kahadloka usa na kini sa inila nga barangay sa lungsod. ANG HUNASAN Festival maoy magdasig kanato ug sa mga dumuduong nga BRGY. MAZAWALO USA KA PARAIISO.

Daghan kaayong salamat Mayor Ramon C. Oñate, Sangguniang Bayan opisyal, Sangguniang Kabataan Federation, PMETC,Inc., Palompon Emergency Rescue Team, Radio Kausabawan, KARANCHO Palompon Chapter, Mazawalo Elementary School, Mazawalo Sangguniang Kabataan opisyal, og sa Brgy. Mazawalo opisyal Kapitan Eden Enorasa og sa iyang mga kaubanan. Kanatong tanan daghan og daghan kaayong salamat sa atong pagtinabangay nga kining unang HUNASAN Festival nag malampuson. Viva Sr. San Roque

#itsMOREfuninPALOMPON


Copyright © 2015. Municipality of Palompon, Province of Leyte. All rights reserved.
Do NOT follow this link or you will be banned from the site!